September het spesiale betekenis vir my.

Behalwe dat dit gewoonlik met groei en 'nuwe beloftes' geassosieer word (begin van Lente) is dit ook my geboortemaand.

As ons bietjie teruggaan in tyd, net vir interessantheid:                                                Die naam September kom van die ou Romeinse woord 'septem', wat sewe beteken, want in die Romeinse kalender was dit die sewende maand. Die Anglo-Saksers het dit 'Gerst Monath' (Garsmaand) genoem, want dit was hul tyd toe hulle gars ge-oes het om hul gunsteling drankie te maak, garsbrou. Hulle het dit ook 'Haefest monath' of Oesmaand, genoem.

Die Romeine het ook geglo dat die maand September deur die god, Vulcanus, regeer word en het hulle dus verwag dat September geassosieer sou word met brande, vulkaniese uitbarstings en aardbewings.

Wel, wel, wel … die laaste deel laat my dink. As jy in die Wes-Kaap woon soos ek, dan is ek seker daarvan dat julle ook verstom staan oor die vreemde weer wat ons tans ondervind. Mense wat in die Noord-Kaap woon ervaar weer buitengewone warm klimaatstoestande en verskriklike veldbrande. Dit is hartverskeurend, want daar is ook 'n tekort aan water.

'n Mens kan Biblies of Wetenskaplik gaan met die bogenoemde, maar die slotsom is dat daar faktore buite ons beheer aan die werk is.